Jergilikti turǵyndardyń áleýmettik nysandarǵa suranysyn óteýde memlekettik-jekeshelik áriptestik jobalarynyń bereri mol.Sońǵy 3 jylda atalǵan bastama arqyly 113 joba iske asyryldy, dep jazady Qamshy.kz aqparat agenttigi. 

Tek 2017–2018 jyldardyń ózinde óńirde demeýshilerdiń bastamasymen 30 joba iske asyryldy. Al aǵymdaǵy jyly 83 joba boıynsha jumystar júrgizilip jatyr. Mundaǵy árbir jobany iske asyrýdyń naqty algorıtmderi ázirlengen. Máselen memlekettik-jekeshelik áriptestik aıasyndaǵy jobalardyń 78 –i bilim salasynda júzege asyrylyp jatyr.

–Bilim salasyna qatysty jobanyń 39-y memlekettik mindettemelerdi talap etpeıdi. Bul jobalar aıasynda 39 mekteptiń janyndaǵy asqanalardy jabdyqtaý jáne senimgerlik basqarýǵa berý jumystary júrgizildi. Atalǵan júıe arqyly oqýshylardy tamaqtandyrý isine 279 mıllıon 500 myń teńgege ınvestısıa tartylmaq. Nátıjesinde 26 621 oqýshy ystyq tamaqpen qamtylatyn bolady.

Memlekettik-jekeshelik áriptestik 2 joba arqyly jeke ǵımaratta ornalasqan 2 memlekettik balabaqshany ǵımaratpen qamtý máselesi sheshilmek. Shý aýdany Shý qalasynda «Balapan», «Astana» balabaqshalaryn ǵımaratpen qamtýda jeke áriptestiń bastamasymen bıznes-josparlar jasaldy. Sondaı-aq Taraz qalasynda №25 jáne 37 balabaqshalardy senimgerlik basqarýǵa berý boıynsha da ınvestısıalyq usynys bar. Al 35 joba jeke menshik balabaqshalarda memlekettik tapsyrysty ornalastyrýdy maqsat etedi.

Memlekettik-jekeshelik áriptestik jobalary densaýlyq saqtaý salasynda qamtyp, Shý qalalyq aýrýhanasyn tomograf jáne№1 Taraz qalalyq aýrýhanasyna angıograf qondyrǵysyn satyp alý josparlanyp otyr. Jalpy quny 1 mıllıard 269 mıllıondy quraıtyn bul jobalar ekonomıkalyq saraptamanyń oń qorytyndysyn aldy. Sondaı-aq óńirde kóshelerdi jaryqtandyrý, Shahrıstan» tarıhı-mádenı ortalyǵy aýmaǵynda sheberler qalashyǵyn jáne «Jas týrıs» balalar – jasóspirimder ortalyǵyn uıymdastyrý syndy bastamalar da memlekettik-jekeshelik áriptestikti qajet etip, –deıdi oblys ákimdiginiń ekonomıka jáne búdjetti josparlaý basqarmasynyń basshysy Gúldana Jaýynbekova.

Energetıka salasynda júzege asyrylatyn memlekettik-jekeshelik áriptestik jobasy Taraz qalasyndaǵy 172 kóshe jaryqtaryn júrgizýdi kózdeıdi. Al týrızm salasyndaǵy memleket pen jeke kásipker alasyndaǵy baılanys Shahrıstan» tarıhı-mádenı ortalyǵy aýmaǵynda sheberler qalashyǵyn jáne «Jas týrıs» balalar – jasóspirimder ortalyǵyn uıymdastyrýǵa ınvestor tartýdy maqsat etedi.